Guddoomiyaha Gobolka Awdal oo Kulan Afur iyo Casho ah u Sameeyey Salaadiinta, Culimaa’udiinka iyo Aqoon-yahanka Gobolka

Guddoomiyaha Gobolka Awdal oo Kulan Afur iyo Casho ah u Sameeyey Salaadiinta, Culimaa’udiinka iyo Aqoon-yahanka Gobolka Boorama – Guddoomiyaha Gobolka Awdal, Mudane C/Rashiid Xasan Mataan, ayaa kulan afur iyo casho ah u sameeyey Salaadiinta, Culimaa’udiinka iyo aqoon-yahanka kala duwan ee ku dhaqan gobolka Awdal. Kulankan oo ka qabsoomay magaalada Boorama ayaa qayb ka ahaa xoojinta wada shaqaynta iyo isfahamka ka dhexeeya maamulka gobolka iyo waxgaradka bulshada. Kulanka afur...ka iyo cashada ah ayaa waxaa ka soo qayb galay salaadiin, culimaa’udiin, aqoon-yahanno, iyo masuuliyiin kale oo ka tirsan maamulka gobolka. Intii uu socday kulanku, ayaa diiradda lagu saaray muhiimadda ay leedahay midnimada bulshada, wada shaqaynta iyo sidii loo sii xoojin lahaa nabadda iyo horumarka gobolka Awdal. Guddoomiyaha Gobolka Awdal Mudane C/Rashiid Xasan Mataan ayaa hadal uu ka jeediyey kulanka ku sheegay in kulankan uu yahay mid lagu muujinayo qadarin iyo tixgelin loo hayo doorka muhiimka ah ee salaadiinta, culimada iyo aqoon-yahanku ku leeyihiin hagidda bulshada iyo ilaalinta nabadda. Waxa uu sidoo kale ku boorriyey dhammaan qaybaha bulshada inay sii xoojiyaan wada shaqaynta iyo isku duubnida si loo gaaro horumar waara. Dhinaca kale, qaar ka mid ah salaadiinta, culimaa’udiinka iyo aqoon-yahanka ka qayb galay kulanka ayaa soo dhaweeyey dadaalka uu guddoomiyuhu sameeyey, iyaga oo ku tilmaamay mid xoojinaya xiriirka ka dhexeeya maamulka iyo bulshada. Waxay sidoo kale ku adkeeyeen muhiimadda ay leedahay in si joogto ah loo yeesho kulamo noocan oo kale ah si loo falanqeeyo arrimaha bulshada iyo horumarka gobolka. Ugu dambayn, kulanka ayaa ku soo dhammaaday jawi wanaagsan oo isfaham iyo duco ah, iyadoo dhammaan ka qaybgalayaashu ay muujiyeen sida ay uga go’an tahay inay ka wada shaqeeyaan nabadda, wadajirka iyo horumarka gobolka Awdal....